സ്വർണ്ണ താറാവ്

അയ്യോ ഭൂമി കുലുക്കം ... ജപ്പാനിൽ ഇപ്പൊ ഭൂമി കുലുക്കം സീസൺ ആണെന്ന് പറഞ്ഞത് സത്യമാണോ അതോ ആ ശരൺ, അവനെ ഓൺസൈറ്റ്  വിടാത്തതിന് പ്രാകിയതാണോ?  ഞാൻ ഉറക്കത്തിൽ നിന്ന് ഞെട്ടി ഉണർന്ന് എഴുന്നേറ്റു ഓടാൻ തുടങ്ങിയതായിരുന്നു അപ്പോഴാണ് ആ വാക്കുകൾ കേട്ടത് ... ദീപക് സാൻ ഓടല്ലേ .. ഞാൻ ക്രിക്കറ്റ് കളിയ്ക്കാൻ വരുന്നോ എന്ന് ചോദിയ്ക്കാൻ വിളിച്ചതാ ...

ഹോ... ക്രിക്കറ്റ് കളിക്കാൻ നീ ഇങ്ങനെ ആണ് കുലുക്കുന്നെ എങ്കിൽ ശരിക്കും ഭൂമി കുലുങ്ങുമ്പോ നീ എങ്ങനെ കുലുക്കുമായിരിക്കും?

ദീപക് സാൻ എന്താ ആലോചിക്കുന്നേ? വരുന്നില്ലേ?

ഹോ ഞാൻ ശരിക്കും പേടിച്ചുപോയി ഷോമോനെ .. ആ ശരണിൻെറ പ്രാക്ക് ആണെന്നല്ലേ ഞാൻ വിചാരിച്ചെ ... അവനു വരേണ്ട ഓൺസൈറ്റ് ഞാൻ അടിച്ചു മാറ്റി എന്നാ അവൻ പറഞ്ഞു നടക്കുന്നെ ... നീ വെക്കേഷനു വന്നപ്പോ "കൊടുത്ത" കുപ്പിയും ചോക്ലേറ്റും ഒക്കെ ഇഷ്ട്ടപ്പെട്ടു എന്ന് പറഞ് ഞാൻ വരുമ്പോ അവൻ നിനക്ക് തരാൻ എന്ന് പറഞ്ഞു കുറച്ചു ചിപ്സ് ഒക്കെ വാങ്ങി തന്നിരുന്നു ...  കൂടോത്രം വല്ലോം ഉണ്ടെങ്കിലോ എന്ന് വിചാരിച്ചു അത് ഞാൻ  നിന്റെ വീട്ടിൽ കൊടുത്തിട്ടാ വന്നേ ...  :-)

ഷോ: ആശാനേ.......
......
ഷോ: ദിപക് സാൻ വരുന്നുണ്ടോ?
ഞാൻ: ഇന്നലെ പാതിരാത്രി കെട്ടും കിടക്കയും ആയി നാട്ടിന്നു എത്തിയ എന്നെ നീ ഇന്നു തന്നെ കൊലക്കു കൊടുക്കുമോടെ ? പോരാത്തതിന് ഉലകം മുഴുവൻ ചുറ്റിയാ ഞാൻ വന്നേ ... കോസ്റ് സേവിങ് ആണല്ലോ എന്റെ മെയിൻ കെ ആർ എ ...
ഷോ: ഹേയ്  ഞാൻ ആ ശരണിനെപോലെ അല്ല...
ഞാൻ: അല്ല അവൻ ഒറ്റയടിക്കു തീർക്കും നീ ഇങ്ങനെ ഇഞ്ച് ഇഞ്ചായിട്ടും ...
ഷോ: ആ... എവിടെയൊക്കെ പോയി, ദിപക് സാൻ ? :-p
ഞാൻ: ഹോ ഒന്നും പറയണ്ട എന്റെ ഷോ ... ചൈന വഴിയാ വരാൻ പ്ലാൻ ചെയ്തേ അവസാനം തായ്‌ലൻഡ് വഴി ഇവിടെ എത്തി ...
ഷോ: ഓ ..അത്രേയുള്ളോ ...
ഞാൻ : എന്താ പോരെ?
ഷോ: ദിപക് സാൻ ശ്രീലങ്ക കണ്ടിട്ടുണ്ടോ
ഞാൻ: ഇല്ല
ഷോ: കൊറിയ?
ഞാൻ: ഇല്ല
ചൈന?
ഇല്ല
ഉക്രൈൻ?
ഇല്ല
ഉഗാണ്ടാ ?
ഇല്ല
ഷോ: എന്നാലെ... ഞാൻ ഇതെല്ലം കൂടി ഒരൊറ്റ യാത്രയിലാ കണ്ടെ ... ങ്ഹാ... പിന്നെ കമ്പനിക്കു ലാഭം ഉണ്ടാക്കാനാണല്ലോ എന്നാലോചിക്കുമ്പോ ഒരു  റിലാക്സേഷൻ ഒക്കെ ഉണ്ട്.

ഞാൻ: ആ... ആ ... നീയെന്താ നേരത്തെ ചോദിച്ചേ? ഞാൻ വേഗം വിഷയം മാറ്റി.
ഷോ: കളിക്കാൻ വരുന്നോ എന്ന്?
ഞാൻ: വോളിബാൾ ആണെങ്കിൽ ഞാനും വരാം.
ഷോ: ഞാനും വോളിബാളിൽ ഒരു പുലിയാ ... ദിപക് സാൻ എങ്ങനാ ? ക്രിക്കറ്റ് ഇവിടെ ഒരുത്തനും അറിഞുടാത്തതോണ്ട് അതിലും ഞാൻ പുലിയാ 
ഞാൻ: ഓ .. ഞാൻ പണ്ട് കോളേജിൽ പഠിച്ചപ്പോ കളിച്ചിട്ടുണ്ട് അത്രേയുള്ളു ... എനിക്ക് ക്രിക്കറ്റ് കളിയ്ക്കാൻ അറിയില്ല ഷോ ...
ഷോ: ഞാനാ ഇവിടെ എല്ലാവന്മാരെയും ഉന്തി തള്ളി കളിക്കാൻ കൊണ്ട് പോകുന്നെ ... ഒരുത്തനും കളിക്കാൻ അറിയില്ല... ഞാൻ ട്രെയിനിങ് കൊടുത്തോണ്ടിരിക്കുവാ...

ഞാൻ: എടാ ..ഇവിടെ ആകെ ആറേഴു പേരല്ലേ ഉള്ളു? അപ്പൊ ബാക്കി ടീമ്സ് ആരാ ജപ്പാൻകാരും വരുമോ?
ഷോ: ഹേയ് അവന്മാരൊക്കെ പുലികളാ അവന്മാരെയൊന്നും നമ്മളുടെ കൂടെ കളിക്കില്ല.
ഞാൻ: ങേ നീയല്ലേ പറഞ്ഞത് നീ പുലിയാണെന്ന് ?
ഷോ: ഞാൻ മാത്രം പുലി ആയിട്ട് കാര്യം ഇല്ലല്ലോ കൂടെ ഉള്ളവന്മാരും വിചാരിക്കണ്ടേ?
ഞാൻ: ഓ ലങ്ങനെ ... സാജൻ ഒക്കെ കളിക്കുമോ ...
ഷോ: ഹേയ് .. മാനേജർ ആണെങ്കിലും ക്രിക്കറ് ബാൾ മാനേജ് ചെയ്യാനൊന്നും അറിയില്ല ... പിന്നെ ഞാൻ പതുക്കെ എറിഞ്ഞു കൊടുക്കും അല്ലെങ്കിൽ ഫസ്റ്റ് ബാളിൽ ഔട്ടാ ...

എടാ അതേയ് ഈ ആറേഴു പേര് മാത്രം ആയിട്ട് എങ്ങനാ ക്രിക്കറ്റ് കളിക്കുന്നെ? ഓൾ ഫീൽഡിങ് ആയാലും മതിയാവില്ലല്ലോ?

അതൊക്കെ ഞാൻ മാനേജ് ചെയ്യും ഒരു സൈഡ് മുഴുവൻ ഞാനാ ഫീൽഡിങ് .. അതുകാരണം ഞാൻ ബാറ്റു ചെയ്യുമ്പോ ചറപറാ ആണ് ബൗണ്ടറി ... എല്ലാം കൂടി എനിക്കും പാടാ അതുകൊണ്ട് അഞ്ചു ഓവർ ആണ് ഒരു മാച്ച്. മാക്സിമം മൂന്ന് മാച്ച് കഴിയുമ്പോ ഞാൻ ഒഴിച്ചു എല്ലാവന്മാരും വെള്ളം കുടിക്കാൻ തുടങ്ങും ... പിന്നെ എന്നോട് ബൗണ്ടറി അടിക്കല്ലേ എന്ന് പറയും ... എനിക്കാണെങ്കിൽ അതാ പതിവ് .. പിന്നെ ഞാൻ പറയും നിർത്താം എന്ന് ...

ഹോ ഈ ഷോ എന്റെ ടീമിന് ഒരു മുതൽക്കൂട്ട് തന്നെ .. ഒരു ഓൾ റൗണ്ട് ടെസ്റ്റർ അല്ലെ ഇവൻ ... അതെങ്ങനാ ഞാൻ തന്നെയല്ലേ ഇന്റർവ്യു ചെയ്തേ .. ഞാൻ അറിയാതെ ഇത്തിരി പൊങ്ങി നിന്നു.

അയ്യോ കാണാൻ പോകുന്ന പൂരം എന്തിനാ കേട്ടറിയുന്നേ വാ നമ്മുക്ക് അങ്ങോട്ട് പോകാം ...
ഏതായാലും എന്റെ ശിഷ്യൻ അല്ലെ അവന്റെ കളി ഞാൻ കണ്ടില്ല എന്ന് വേണ്ട .. ഞാനും അങ്ങനെ ക്രിക്കറ്റ് ഗ്രൗണ്ടിൽ എത്തി. എനിക്ക് കളിയ്ക്കാൻ അറിഞ്ഞൂടാത്തൊണ്ട് ഔട്ട് പെറുക്കാൻ നിന്നോളാൻ ഷോമോൻ സമ്മതിച്ചു. പിന്നെ കുറച്ചു കഴിയുമ്പോ വെള്ളം കൊടുക്കാനും  ആള് വേണമല്ലോ.

അങ്ങനെ ആദ്യ ഓവർ ദാസപ്പൻ എറിയാൻ തുടങ്ങി ബാറ്റിംഗ് സാജനും. ഇതെന്താടാ ഓൾ റൗണ്ടർ ആയ നീ ബാറ്റിംഗ് എടുക്കാതെ സാജൻ ബാറ്റു ചെയ്യുന്നേ?

ഷോ: അതിപ്പോ ആര് ഓപ്പൺ ചെയ്താലും എന്റെ ടീം അല്ലെ ജയിക്കൂ .. സാജൻ സാൻ ബാറ്റ് ചെയ്യട്ടെ ... പോരെങ്കിൽ ദാസപ്പന്റെ സെന്റ് ഓഫ് മാച്ചാണിത് അപ്പൊ ബൗളിംഗ് അവനല്ലേ ഓപ്പൺ ചെയ്യേണ്ടത്?

ഞാൻ : ങേഹ് ? അല്ലെങ്കിലും അതെങ്ങനാ ബാറ്റിങ്ങും ബൗളിങ്ങും നീ തന്നെ ചെയ്യുന്നേ?
ഷോ: അതല്ല ദീപക് സാൻ ഞാൻ ഉദ്ദേശിച്ചത് ..അതായത് ....
ഞാൻ: ആ .. ആ നീ ഒന്നും ഉദ്ദേശിക്കണ്ട ...

ദേ പോയി ...
ഷോ: ശോ ... സംസാരിച്ചോണ്ട് നിന്ന് ബാൾ പോയത് കണ്ടില്ല ...
ഞാൻ : എനിക്ക് വെയില് കൊള്ളാൻ വയ്യ എനിക്ക് വിയർപ്പിൻറെ അസുഖം ഉള്ളതാ .. ഔട്ട് ബോള് പോകുമ്പോ ഞാൻ വന്നു എടുക്കാം .. നിങ്ങള് കളിക്ക് ഞാൻ അവിടെ തണലത്തു നിൽക്കാം ഞാൻ പതിയെ സ്‌കൂട് ആയി.
ഫസ്റ്റ് ഓവർ കഴിഞപ്പോ സ്‌കോർ 15 / 1. മുന്നു ഫോർ   മിസ്ഫീൽഡ്  ആക്കിയതും പിന്നെ ഒരു ഓവർത്രോയും ചേർത്ത് പതിമുന്നു റൺ ഷോ യുടെ സംഭാവന!!

പീന്നീട് അധികം  സ്‌കോറിങ് ഒന്നും ഉണ്ടായില്ല എങ്കിലും ഷോ നല്ലപോലെ വെള്ളം കുടിക്കുന്നുണ്ടായിരുന്നു. ഇടയ്ക്ക് ദാസപ്പൻ വന്നു വെള്ളം കുപ്പി എടുത്തു നോക്കി എന്തോ പിറു പിറുത്തു പോകുന്ന കണ്ടു .

ഷോ ലാസ്‌റ് ബാറ്റ്സ്മാൻ ആയി ലാസ്‌റ് ഓവറിൽ ഇറങ്ങുമ്പോ സ്‌കോർ 25 /3. വിജേഷിന്റെ ഫസ്റ്റ് ബാളിൽ ഷോ ക്ളീൻ ബൗൾഡ് :-)

ഹാഫ് ടൈമിൽ  വെള്ളം കുടിക്കാൻ വന്ന എല്ലാരും ഒഴിഞ്ഞ കുപ്പി നോക്കി എന്തോ പിറു പിറുക്കുന്നുണ്ടായിരുന്നു. എന്നെയാണോ പറയുന്നത് എന്ന സംശയം കാരണം ഞാൻ വെള്ളം വാങ്ങികൊണ്ടുവരാം എന്ന ഓഫർ വച്ചു. വെള്ളം വാങ്ങി വന്നപ്പോളേക്കും ദാസപ്പൻ പറഞ്ഞു ഫസ്റ്റ് ഗെയിം കഴിഞ്ഞു എന്ന്.
ഞാൻ: ങേ അതെങ്ങനെ പത്ത് മിനിട്ടല്ലേ ആയുള്ളൂ ഞാൻ പോയിട്ട് ...ഞാൻ വാച്ചിലേക്ക് നോക്കി ചോദിച്ചു ...
ദാസ്: അത് ശരിയാ പക്ഷെ ഫസ്റ്റ് ഓവർ ബൗൾ ചെയ്തത് ഷോ ആണ്. അവനു അഞ്ചു ബോൾ എറിയാൻ പത്തു മിനിട്ട് തന്നെ അധികം ആണ്. വിജേഷിന്റെ സ്‌കോർ 30, ഗെയിമ് ഓവർ.

പറയുമ്പോ എല്ലാം പറയണമല്ലോ രണ്ടാമത്തെയും മൂന്നാമത്തെയും കളിയിലും സ്‌കോർ ബോർഡ് തുറക്കാൻ ഷോ നാന്നായി ശ്രമിച്ചു  പക്ഷെ എല്ലാരും സമ്മതിക്കണമല്ലോ ... ഹാട്രിക് വിക്കറ്റ്, ഹാട്രിക് ബൗണ്ടറി എന്നൊക്കെ കേട്ടിട്ടുണ്ട് ഹാട്രിക് ഗോൾഡൻ ഡക്ക് ഞാൻ കാണുന്നത് ആദ്യമായിട്ടായിരുന്നു.  ശരിക്കും എന്റെ ടീമിന് ഒരു മുതൽക്കൂട്ട് ആയി.

കുറ്റം മാത്രം പറയരുതല്ലോ! അന്നത്തെ കളിയിൽ ഹാട്രിക്ക് ഗോൾഡൻ ഡക്ക് ആയെങ്കിലെന്താ, പത്തറുപത് റൺസ് കൊടുത്തെങ്കിലെന്താ, എല്ലാ കളിയും ഷോയുടെ ടീം തോറ്റെങ്കിലെന്താ, രണ്ടു  വിക്കറ്റു ഷോ എടുത്തു. രണ്ടും ക്ളീൻ ബൗൾഡ്.

വാൽ: അന്നാ ഇന്റർവ്യൂ എടുക്കുന്ന ദിവസം എനിക്ക് പനി ആയി ലീവ് എടുത്തിരുന്നെങ്കിൽ മുകളിൽ പറഞ്ഞതെല്ലാം വെറും സാങ്കല്പികം എന്ന് പറയാമായിരുന്നു. ഇതിപ്പോ എങ്ങനാ ? എന്നാലും... ജീവിച്ചിരിക്കുന്നവരോ മരിച്ചവരോ ആയ ആരോടെങ്കിലും സാമ്യം തോന്നിയാൽ യാദൃശ്ചികം മാത്രം.